O Parador de Ribadeo é un excelente miradoiro sobre a Ría, unha gran casa galega na desembocadura do río Eo situada nun fermoso pobo mariñeiro e turístico, rodeado de verde e mirando ao mar. Esta magnífica situación, na fronteira de Galicia con Asturias, permitirache contemplar vistas únicas da paisaxe galega, da ría de Ribadeo e das vilas asturianas da outra beira.

No hotel prevalece o estilo mariñeiro, elegante e coidado. As habitacións son acolledoras e, tanto as súas panorámicas como as que descubrirás dende o comedor, son espléndidas. Non deixes escapar a oportunidade de probar a exquisita cociña tradicional galega, con pratos como a empanada, o lacón, ou os mariscos e os viños galegos.